ನೀರಾವರಿಗೆ ಹೆಚ್ಚಿನ ಆಧ್ಯತೆ ನೀಡಲಾಗಿದೆ- ಕೆ.ಎಸ್.ಆನಂದ್

ಶುಕ್ರವಾರ ತಾಲ್ಲೂಕಿನ ಮಧಗದ ಕೆರೆಗೆ ತಾಲ್ಲುಕಿನ ಜನತೆ ಪರವಾಗಿ ಸಾಂಪ್ರದಾಯಿಕವಾಗಿ ಭಾಗಿನ ಸಮರ್ಪಿಸಿ, 50 ಕೋಟಿ ವೆಚ್ಚದಲ್ಲಿ ಮಧಗದ ಕೆರೆ ಮೂಲಕ 25 ಕೆರೆಗಳಿಗೆ ಗುರುತ್ವಾಕರ್ಷಣೆ ಮೂಲಕ ನೀರು ತುಂಬಿಸುವ ಹಾಗೂ ಕಾಲುವೆಗಳ ಆಧುನೀಕರಣ ಕಾಮಗಾರಿಗೆ ಚಾಲನೆ ನೀಡಿ ಅವರು ಮಾತನಾಡಿದರು.

ಕಡೂರು ತಾಲ್ಲೂಕನ್ನು ಅತೀ ಅಂತರ್ಜಲ ಬಳಕೆ ಪ್ರದೇಶವೆಂದು ಗುರುತಿಸಲಾಗಿದೆ. ಇಲ್ಲಿನ ರೈತರಿಗೆ ಅತ್ಯಂತ ಅಗತ್ಯವಾಗಿರುವುದು ಶಾಶ್ವತ ನೀರಾವರಿ. ಈ ನಿಟ್ಟಿನಲ್ಲಿ ಈಗಾಗಲೇ ಭಧ್ರಾ ಉಪಕಣಿವೆ ಯೋಜನೆ ಪ್ರಗತಿಯಲ್ಲಿದೆ.  ಬರಗಾಲ ಪೀಡಿತ ಪ್ರದೇಶ ಎಂದೇ ಹಣೆಪಟ್ಟಿ ಹೊತ್ತಿರುವ ಕಡೂರು ಅದರಿಂದ ಹೊರಬರುವ ದಿನಗಳು ಹತ್ತಿರದಲ್ಲಿದೆ.ಕ್ಷೇತ್ರದಲ್ಲಿ 2ನೇ ಹಂತದ ಭದ್ರಾ ಉಪ ಕಣಿವೆ ಯೋಜನೆಗೆ ತಾಲ್ಲೂಕಿನ 118 ಕೆರೆಗಳನ್ನು ತುಂಬಿಸುವ ಕಾಮಗಾರಿ ನಡೆಯುತ್ತಿದ್ದು, 2ನೇ ಹಂತದ ಕಾಮಗಾರಿಯನ್ನು ಮುಗಿಸಲು 2026ರ ಜೂನ್ ಒಳಗೆ ಸಮಯ ನಿಗಧಿ ಪಡಿಸಲಾಗಿದೆ. ನಿಗಧಿತ ಅವಧಿಯೊಳಗೆ ಕಾಮಗಾರಿ ಮುಗಿಯುವ ವಿಶ್ವಾಸವಿದೆ ಎಂದರು.

ಮಧಗದ ಕೆರೆಯಿಂದ 25  ಕೆರೆಗಳಿಗೆ ಗುರುತ್ವ ಶಕ್ತಿಯ ಮೂಲಕ ನೀರು ತುಂಬಿಸುವ ಮತ್ತು ಹೊಸಮಧಗದ ಕೆರೆ ಹಾಗೂ ಕಾಲುವೆಗಳ ಆಧುನೀಕರಣಗೊಳಿಸುವ ಕಾಮಗಾರಿಯ ಅನುಷ್ಠಾನಕ್ಕಾಗಿ  ₹50 ಕೋಟಿ ವೆಚ್ಚದ ಯೋಜನೆಗೆ ಸರ್ಕಾರ ಆಡಳಿತಾತ್ಮಕ ಅನುಮೋದನೆ ನೀಡಿದೆ. ಇದರಿಂದ ಮಧಗದ ಕೆರೆ ವ್ಯಾಪ್ತಿಯಲ್ಲಿ 6407.00 ಹೆಕ್ಟೇರ್ ಪ್ರದೇಶದ ಶೇ30ರಷ್ಟು ನೀರಾವರಿ ಸೌಲಭ್ಯ ಒದಗಿಸಲು ಸಾಧ್ಯವಾಗುತ್ತದೆ. 50 ಕೋಟಿ ವೆಚ್ಚದಲ್ಲಿ ಮಧಗದ ಕೆರೆ ವ್ಯಾಪ್ತಿಯ ಪ್ರಮುಖ ಕಾಲುವೆಗಳು, ಮಡಬಾಯಿಗಳು, ಸೇತುವೆಗಳು ಸುಸಜ್ಜಿತಗೊಳ್ಳಲಿವೆ. ಮಧಗದ ಕೆರೆಯಾಶ್ರಿತ ಕೃಷಿ ಭೂಮಿಗಳಿಗೆ ಇದು ಬಹು ದೊಡ್ಡ ಕೊಡುಗೆಯಾಗಿದ್ದು,ತಾಲ್ಲೂಕಿನ ಜನತೆಯ ಪರವಾಗಿ ಸರ್ಕಾರಕ್ಕೆ ಕೃತಜ್ಞತೆ ಸಲ್ಲಿಸುತ್ತೇನೆ ಎಂದರು.